बुटवल,११ फागुन ।
रुपन्देही क्षेत्रनम्बर १ मा नेपाली कांग्रेसका उम्मेद्वार हिराबहादुर खत्रीले महिलालाई घरमै बसेर कमाउन सक्ने बनाउने योजना ल्याउन आवश्यक भएको बताएका छन् । अझै पनि ग्रामिण क्षेत्रका महिलाहरु घरमै बसेर घरको कामकाजमै समय बिताउने गरेको उल्लेख गर्दै उनलेे घरमै बसेर समय बिताउने महिलाहरुका लागि थोरै भएपनि घरमै बसेर आत्मनिर्भर बनाउने योजना ल्याउने बताए ।
रुपन्देही क्षेत्रनम्बर १ अन्तरगतका दक्षिणी भेगका पालिकाहरुमा सोमबार घरदैलोसँगै सुझाव संकलन तथा संवाद गर्नु भएका उम्मेद्वार खत्रीले महिलालाई आत्मनिर्भर र आर्थिकोपार्जनमा अब्बल बनाउने गरि योजना बनाएको सुनाए । महिलालाई सीपसँग जोडेर उनीहरुलाई घरमै बसेर पनि आत्मनिर्भर बनाउनु अहिलेको आवश्यकता भएको बताउँदै उम्मेद्वार खत्रीले सानो–सानो सीप र इलम सिकाएर आफ्नो खुट्टामा आफै उभिन सक्ने बनाउने बताए । समृद्ध नेपालीका लागि र मुलुकको विकासकालागि पनि पहिले महिलाको जीवनस्तर उकास्न जरुरी रहेको बताउदै खत्रीले महिला सशक्तिकण र आत्मनिर्भरताको पक्षमा आफुले सदनमा बहस गर्ने विश्वास ब्यक्त गरे । क्षेत्रनम्बर एकका देवदह, तिलोत्तमा, रोहिणी र ओम सतियाका विभिन्न वडामा दैनिक घरदैलो गरेका खत्रीले मतदाताको आवश्यकता, सुझाव र जिज्ञासा संकलन गर्दै हिडेकाे निर्वाचन परिचालन समिति संयोजक हरि काफ्लेले जानकारी दिए । घरदैलो कार्यक्रममा सुशासन, विकास निर्माण, कृषिको आधुनिकिकरण, युवालाई रोजगारलगायतका विषयहरुलाई आम मतदाताले उम्मेदवार खत्री समक्ष राखेको संयोजक काफ्लेले बताए ।
