बुटवल,४ साउन ।
रूपन्देहीसहित देशका विभिन्न जिल्लामा भएका सवारी दुर्घटनामा तीन जनाको मृत्यु भएको छ । रुपन्देही, दाङ र सुनसरीमा भएका छुट्टाछुट्टै सवारी दुर्घटनामा ३ जनाको मृत्यु भएको हो ।
रुपन्देहीको गैडहवा गाउँपालिका–८ सितलडाँडास्थित सडकमा लु. ६१ प ७२३८ नम्बरको मोटरसाइकलको ठक्करबाट पैदल यात्री सोही ठाउँ बस्ने अर्घाखाँची सन्धिखर्क नगरपालिका–१ सन्धिखर्क घर भएकी ६८ वर्षीया कुमारी कुँवरको मृत्यु भएको छ ।
शनिबार बेलुकी भएको उक्त दुर्घटनामा गम्भीर घाइते भएकी उनको चौराहा अस्पताल बुटवलमा उपचारको क्रममा गएराति मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ ।
उता दाङको लमही नगरपालिका–५ सुनखोलीमा लु. ३ च ४८१४ नम्बरको बोलेरो पिकअपले च्यापेर सोही ठाउँ बस्ने २१ वर्षीय राकेश कुमार बानियाँको आइतबार बिहान मृत्यु भएको छ । आफ्नै घर अगाडि पार्किङ गरी राखेको बोलेरोको पछाडिको टायरमा ओट लगाएको ढुङ्गा निकाल्ने क्रममा बोलेरो ब्याक भई च्याप्दा गम्भीर घाइते भएका राकेशको लमही अस्पतालमा उपचारको क्रममा मृत्यु भएको हो ।
त्यस्तै सुनसरीको इनरुवा नगरपालिका ७ बर्छुवा चोकस्थित सडकमा बर्छुवा चोकबाट मुसहरी टोलतर्फ जाँदै गरेको को–३४ प ५१६ नम्बरको मोटरसाइकल अनियन्त्रित भई शनिबार राति दुर्घटना हुँदा चालक सोही ठाउँ बस्ने ३५ वर्षीय पारस यादवको मृत्यु भएको छ ।
दुर्घटनामा गम्भीर घाइते भएका उनको जिल्ला अस्पताल इनरुवामा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ ।
दुर्घटनाका सम्बन्धमा आवश्यक अनुसन्धान भइरहेको प्रहरीले जानकारी दिएको छ ।
