चितवन,५ भदौ ।
पहिरो खसेर सोमबार राती ८ बजेबाट अवरुद्ध भएको नारायणगढ-मुग्लिन सडक खण्ड १७ घण्टापछि संचालनमा आएको छ । सडक डिभिजन कार्यालय भरतपुरले ३ वटा स्काभेटर प्रयोग गरि पहिरो पन्छाएपछि मंगलबार १२ः५५ बजेबाट सडक सुचारु भएको हो ।
राती ८ बजेबाट अवरुद्ध सडक खुलाउन रातभरी साधन श्रोत परिचालन गरिएको सडक डिभिजन कार्यालय भरतपुरले जनाएको छ ।
पहिरो पन्छाउने क्रममा खसेको ढुँगाले पहिरो पन्छाउन प्रयोग भएको लोडरको अगाडीको भागमा क्षति भएको थियो । लोडरको अगाडिको भागको सिसा फुटेपनि मानवीय क्षति भने नभएको कार्यालयले जनाएको छ ।
सडक डिभिजनको २ वटा मेशिन नारायणगढतर्फबाट र १ वटा एक्साभेटर मुग्लिनतर्फबाट पहिरो पन्छाउने कार्य परिचालन गरिएको थियो ।





