बुटवल,३ असाेज ।
लुम्बिनी प्रदेशका मुख्यमन्त्री कुलप्रसाद केसी सोनामले संविधान कार्यान्वयनमा केही चुनौती भएपनि राष्ट्र सहि ट्रयाकमा फर्किएर अगाडि बढेको बताएका छन् ।
संविधान दिवस–२०७८ को अवसरमा प्रदेश सरकारद्वारा आइतबार बुटवलमा आयाेजित मूल समारोहलाइ सम्बोधन गर्दै केसीले संविधानको पूर्ण पालना र संवर्धनका लागि सबै राजनीतिक दल तथा नेपाली जनताहरुलाइ आग्रह समेत गरे ।
संविधान गतिशील दस्तावेज भएको भन्दै उनले संविधानभित्रै रहेर यसलाई अझै समृद्धि बनाउदै लैजान सकिने बिचार व्यक्त गरे ।
‘हाम्रो संविधानले संघीय लोकतान्त्रिक गणतन्त्र,धर्मनिरपेक्षता, सामाजिक न्यायसहितको समानुपातिक समावेशी शासन व्यवस्था लगायत वलिदानीपूर्ण संघर्षबाट नेपाली जनताले प्राप्त गरेका अधिकारहरूलाई संस्थागत गरेको छ ।’ उनले भने-‘ यो ऐतिहासिक दिनमा सम्पूर्ण नेपाली तथा प्रदेशबासी जनसमुदायमा बधाई ज्ञापन गर्दै आफ्ना अधिकारहरूलाई संस्थागत गरेको संविधानप्रति गौरव गर्न अपील गर्दछु ।’
सार्वभौम नेपाली जनताले आफ्नो संविधान आफै जारी गरेको ऐतिहासिक दिन संविधान दिवस तथा राष्ट्रिय दिवस–२०७८ मनाइएको हो ।
यसैबीच प्रदेश पदक सिफारिश समितिले गरेको सिफारिस अनुसार ५७ जनालाई प्रदेश सरकारको तर्फबाट कदर तथा सम्मान स्वरुप प्रदेश पदकद्वारा विभूषितका लागि नाम घाेषणा गरे ।
सो अबसरमा प्रदेश प्रमुख अमिक शेरचन,सभामुख पूर्णबहादुर घर्ती मगर,उपसभामुख कृष्णी थारु,पर्यटन तथा सहकारीबिकास मन्त्री डिल्ली चौधरी लगायतको सहभागीता रहेको थियो ।
