मकवानपुर,२९ फागुन ।
मकवानपुरको मनहरि गाउँपालिका–६ सुनाचुरीमा बस र ट्रक ठोक्किदा तीन जनाको मृत्यु भएको छ भने १० जना घाइते भएका छन् ।
वीरगन्जबाट बिहान ३ बजे चितवनका लागि छुटेको ना ४ ख ५१४९ नम्बरको बस र चितवनबाट हेटौँडाका लागि छुटेको ना ६ ख ८९ नम्बरको ट्रक ठोक्किएर दुर्घटना भएको हो ।
दुर्घटनामा बस चालक वीरगन्ज–१५ का ३५ वर्षका मदनकुमार थापा, बसमा रहेका भारत सिस्वाका ४० वर्षका अभयलाल कुश्वाह र भारत विहारका ४० वर्षका सुनिलकुमारको मृत्यु भएको जिल्ला प्रहरी कार्यालय मकवानपुरका प्रहरी उपरीक्षक सोमेन्द्र सिंह राठोरले जानकारी दिए ।
बसका चालक थापा र सुनिलकुमारको उपचारको क्रममा चितवन स्थित पुरानो मेडिकल कलेज र कुश्वाहको हेटौँडा अस्पतालमा मृत्यु भएको प्रहरीले जनाएको छ ।
घाइतेहरुको हेटौँडा अस्पतालमा उपचार भइरहेको छ ।
