काठमाण्डौ,२४ फागुन ।
आज पनि काठमाण्डौ उपत्यकासहित पहाडी क्षेत्रमा हल्का पानी पर्ने सम्भावना रहेको जल तथा मौसम विज्ञान बिभागले जनाएको छ ।
मौसमविद् समिर श्रेष्ठकाअनुसार आज देशका धेरै ठाउँको मौसम आंशिकदेखि सामान्य बद्ली रहने छ । दिउँसोपछि पहाडी क्षेत्रका केही ठाउँमा हल्का वर्षा हुने सम्भावना रहेको उनले जानकारी दिए ।
आज सुदूरपश्चिम प्रदेशको मौसम पूर्णरुपमा बद्ली हुने र त्यहाँका हिमाली क्षेत्रमा हिमपात हुने मौसमविद् श्रेष्ठले बताए । तराईका जिल्लाको मौसम भने आंशिक बद्ली हुनेछ । त्यस्तै भोलि पनि देशका धेरै ठाउँको मौसम यस्तै रहने अनुमान छ ।
नेपालमा पश्चिमी वायुको आंशिक प्रभाव रहेकाले मौसम बद्ली भएको मौसमविद्को भनाइ छ । पर्सिदेखि भने बिस्तारै मौसम खुल्दै जाने मौसमविद्ले बताएका छन् ।
