दाङ,२४ माघ ।
ट्याक्टरले मोटरसाइकललाई ठक्कर दिँदा दाङको लौबस्तामा दुई जनाको मृत्यु भएको छ ।
मृत्यु हुनेमा दाङको दंगिशरण गाउँपालिका वडा नं. ३ हेकुलीका २५ वर्षीय विवेक थापा र वडा नं. ४ बैबाङका २६ वर्षीय दिनेश खड्का रहेका छन् ।
दुर्घटनामा परी गम्भीर भाइते भएका उनीहरु दुबै जनाको शुक्रबार राति उपचारका क्रममा बाँकेस्थित कोहलपुर मेडिकल कलेजमा मृत्यु भएको हो । थापाले मोटरसाइकल चलाएका थिए भने खड्का पछाडि सवार थिए ।
इलाका प्रहरी कार्यालय तुलसीपुरका प्रहरी प्रवक्ता प्रहरी निरीक्षक झकल शर्माका अनुसार दुर्घटनामा परी सोही मोटरसाइकलमा सवार दंगिशरण–३ रातवगाउँका २४ वर्षीय आकाश कँडेल घाइते भएका छन् । उनको पनि कोहलपुरमा उपचार भइरहेको छ ।
प्रहरी निरीक्षक शर्माका अनुसार शुक्रबार बेलुका सवा ८ बजेतिर तुलसीपुरबाट पश्चिमतर्फ जाँदै गरेको रा१त ३४४१ नम्बरको ट्रयाक्टरले पश्चिमबाट तुलसीपुरतर्फ आउँदै गरेको रा ६प १४३४ नम्बरको मोटरसाइकललाई दंगिशरण–५ लौबस्ता भन्ने ठाउँमा ठक्कर दिएको थियो ।
तीब्र गतिका कारण उक्त दुर्घटना भएको हुन सक्ने शर्माले बताए ।
