काठमाडौं,२० पुस ।
निर्वाचन आयोगसहित विभिन्न सरकारी कार्यालयका वेबसाइटहरू ह्याक गरेको आरोपमा प्रहरीले दुई जनालाई पक्राउ गरेको छ ।
पक्राउ पर्नेहरूमा झापाको मेचीनगर नगरपालिका–९ घर भएका २० वर्षीय सन्तोष चिमरिया र सोही ठाउँ घर भएका १९ वर्षीय विकास पौडेल छन् ।
चिमरियालाई झापाबाट र पौडेललाई सिन्धुपाल्चोकबाट पक्राउ गरेको प्रहरीको केन्द्रीय साइबर ब्यूरोले जनाएको छ ।
उनीहरूले निर्वाचन आयोग, नेपाल मेडिकल काउन्सिल, राष्ट्रिय परिचयपत्र तथा पञ्जीकरण विभागको वेबसाइट ह्याक गरेको आरोप छ ।
सरकारी वेबसाइटहरू सिलसिलेवार रूपमा ह्याक र डाटा ब्रिच गरिएको यो घटनामा सीएमडी नेपाल, नेपाली फर नेपाल समूहले आफूले घटना घटाएको दाबी गर्दै आएको थियो ।
पक्राउ परेकाहरूकाे साथबाट ४ थान ल्यापटप, १० थान एन्ड्रोइड मोबाइल, १ थान आइफोन, फिचर फोन, हार्ड ड्राइभ र रिपिटर बरामद गरिएको साइबर ब्यूरोका प्रवक्ता दीपक राज अवस्थीले जानकारी दिए ।
