बुटवल,२३ भदौ ।
अरुन्धतीसहित सप्तऋषिको पूजा गरेसँगै आजबाट यस वर्षको तीज पर्व समापन भएको छ ।
तीजको अन्तिम दिन आज ऋषिपञ्चमी पर्व नेपाली महिलाहरूले अरुन्धतीसहित सप्तऋषिको पूजा गरी मनाएसँगै यस वर्षको तीज पर्व बिधिवत रूपमा समापन भएको हो ।
हरेक वर्ष भाद्र शुक्ल पञ्चमीका दिनमा मनाइने यो पर्वमा महिलाले बिहानै उठेर नित्यकर्म गरी नजिकको नदी, खोला, ताल, तलैया र पोखरीमा गई तीन सय ६५ वटा दतिउनले दाँत माझ्ने र स्नान गर्ने गर्छन् । स्नान गरेपछि अरुन्धतीसहित अत्रि, गौतम, भारद्वाज, जमदग्नि, वशिष्ठ, कश्यप र विश्वामित्रको पूजा गर्ने गरिन्छ । जसलाई ऋषिपञ्चमीको पूजा लगाउने भनिन्छ ।
यस वर्ष गएकाे बिहीवार दर खाएर शुरू भएको तीज पर्व आज सकिएको हो ।
पहिलो दिन भाद्र शुक्ल द्वितीयामा छोरी, चेलीलाई घरमा बोलाएर दर खुवाइएको थियो ।
दोस्रो दिन भदौ २१ गते भाद्र शुक्ल तृतीयामा व्रत बसी उमामहेश्वर पूजाआराधनासहित पारिवारिक कल्याणको कामना गरिएको थियो ।
तेस्रो दिन भदौ २२ गते अर्थात् भाद्र शुक्ल चतुर्थीका दिन हरितालिका व्रत समापन गरी भगवान् गणेशको पूजाआराधना गरिएको थियो ।
आज खोला, नदी, ताल, तलाउ, पोखरीमा गई दतिउनले स्नान गरेर अरुन्धतीसहित सप्तऋषिको पूजाआराधना गरेपछि तीज पर्व समापन भएको हो ।
