सप्तरी,९ चैत ।
हात छाडेर तीव्र गतिमा मोटरसाइकल कुदाउँदा सप्तरीमा एक जनाको मृत्यु भएको छ भने अर्का एक जना गम्भीर घाइते भएका छन् ।
मृत्यु हुनेमा सप्तरीको तिलाठी कोइलाडी गाउँपालिका–४ का १५ वर्षीय मोटरसाइकल चालक विवेक कुमार मण्डल रहेका छन् ।
सप्तरीको राजविराजबाट हनुमाननगरतर्फ तीव्रगतिमा जाँदै गरेको ’अन टेस्ट’ मोटरसाइकल सप्तरीको राजविराज नगरपालिका–१५ खाँडो पुल नजिक अनियन्त्रित भएर दुर्घटना भएको प्रहरीले जनाएको छ ।
दुर्घटनामा मोटरसाइकलमा सवार सप्तरीकै हनुमाननगर कंकालिनी नगरपालिका इनरुवाका १५ वर्षीय कौशल कुमार मण्डल गम्भीर घाइते भएका छन् ।
घाइते दुवै जनालाई गजेन्द्रनारायण सिंह अस्पताल राजविराजमा भर्ना गरिएकोमा विवेकको उपचारको क्रममा मृत्यु भएको हो । टाउको र छातीमा चोट लागेर घाइते भएका कौशलको अवस्था गम्भीर रहेको जिल्ला प्रहरी कार्यालय सप्तरीले जनाएको छ ।
