भैरहवा १ माघ
प्रधानमन्त्री कप राष्ट्रिय क्रिकेट प्रतियोगिता पुरुषतर्फको छनौट खेलमा रुपन्देही प्रादेशिक च्याम्पियन बनेको छ ।
रुपन्देहीको भैरहवा स्थित सिद्धार्थ रंगशालामा बिहीबार भएको खेलमा बाँकेलाई १०७ रनको फराकिलो अन्तरले पराजित गर्दै रुपन्देही च्याम्पियन बन्न सफल भएको हो ।
प्रदेश स्तरीय छनाेट प्रतियोगितामा बाँके उपविजेता बनेकाेे छ ।
टस जितेर पहिले ब्याटिङ गरेको रुपन्देहीले निर्धारित ४० ओभरको खेलमा ८ विकेटकाे क्षतिमा १८७ रनको योगफल बनाएको थियो । उसका लागि संदीप रजालीले सर्वाधिक ८९ रनको योगदान गरे । यस्तै, प्रकाश केसीले ३५, कृष्ण कार्कीले १९ र विक्रम भुसालले १४ रन बनाए ।
बलिङमा बाँकेका अजय साहनी र आकाश विष्टले ३÷३ तथा दीपेन्द्र राउत, सिद्धान्तराज साहीले १÷१ विकेट लिए ।
जवाफी ब्याटिङ गरेको बाँके २६ दशमलब ३ ओभरमा सबै विकेट गुमाएर ८० रनमै समेटियो ।
उसका लागि रमेश सिंहले १९ र सुविन्द्र पाण्डेले १० रन बनाए पनि अन्य ब्याट्सम्यानले दोहोरो अंक जोड्न सकेनन् ।
बाँकेलाई सस्तैमा रोक्न रुपन्देहीका अनिल खरेलले ५ विकेट लिए । यस्तै, नितेश थापाले २, धिरज साही, कृष्ण कार्की र दुर्गेश गुप्ताले समान १÷१ विकेट लिए ।
रुपन्देहीका संदीप रजाली म्यान अफ द फाइनल भई ५ हजार रुपैयाँ पुरस्कार प्राप्त गरे भने रुपन्देहीकै विक्रम भुसाल म्यान अफ द सिरीज भई १० हजार रुपैयाँ प्राप्त गरे ।
विजेता र उपविजेता टिमलाई नेपाल क्रिकेट संघका पूर्व केन्द्रिय सदस्य आशा गुरुङ लगायतले ट्रफी र प्रमाणपत्र प्रदान गरेका थिए ।
प्रतियोगितामा उत्कृष्ट प्रदर्शन गरेका खेलाडीहरु छनौट गरी माघ ३ गतेबाट काठमाडौंमा हुने प्रधानमन्त्री कप राष्ट्रिय क्रिकेटका लागि लुम्बिनी प्रदेशस्तरीय टिम छनौट गरिने छ ।
