धरान,२८ पुस ।
नेकपा प्रदेश–१ प्रचण्ड नेपाल–समूहको संसदीय दलले मुख्यमन्त्री शेरधन राईसहितका आठ जनालाई सांसद पदबाट निलम्बन गरेको छ ।
तीन महिनासम्म प्रदेशसभाको कुनै पनि गतिविधिमा सहभागी हुन नपाउने गरी उनिहरुलाई निलम्बन गरिएको नेकपा प्रचण्ड–नेपाल समूह प्रदेश संसदीय दलले जनाएको छ ।
प्रचण्ड नेपाल–समूहको संसदीय दलले विज्ञप्ति जारी गरी मुख्यमन्त्री राई सहित ८ जनालाई तीन महिनाका लागि निलम्बन गरेको जनाएको हो ।
निलम्बनमा पर्नेमा मुख्यमन्त्री राईसहित भूमि व्यवस्था, कृषि तथा सहकारी राज्यमन्त्री रामबहादुर मगर, आन्तरिक मामिला तथा कानुनमन्त्री हिक्मतकुमार कार्की, भौतिक पूर्वाधार विकास राज्यमन्त्री अम्बिरबाबु गुरुङ, प्रमुख सचेतक बुद्धिकुमार राजभण्डारी, न्याय प्रशासन तथा विधायन समिति सभापति इन्द्रमणि पराजुली, अम्बिका थापा र विमल कार्की रहेका छन् ।
दलको कुनै पनि बैठकमा उपस्थित नभएर पार्टी र सरकारको हित विपरीत गतिविधिमा संलग्न रहेको भन्दै नेकपाको संसदीय दलको विधान २०७६ बमोजिम उनिहरुलाई तीन महिनाका लागि कुनै पनि गतिविधिमा संलग्न नहुने गरी निलम्बन गरेको विज्ञप्तिमा उल्लेख छ ।
उनीहरुलाई यसअघि मुख्यमन्त्री राईले प्रचण्ड–नेपाल समूहले आफूविरुद्ध प्रस्ताव गरेको अविश्वास पत्रमा हस्ताक्षर गर्ने १६ जनालाई तीन महिनाका लागि निलम्बन गरेको घोषणा गरेका थिए ।
