बुटवल,९ असार ।
निर्वाचन आयोगले नेपाली कांग्रेसको तर्फबाट निर्वाचित तीनजना स्थानीय तहका जनप्रतिनिधिहरूको पद रिक्त भएको घोषणा गरेको छ ।
२०७९ सालको स्थानीय तह निर्वाचनमा नेपाली कांग्रेसबाट उम्मेदवार भई विजयी भएका ती प्रतिनिधिहरूले दल त्याग गरी अन्य राजनीतिक दलमा प्रवेश गरेपछि आयोगले उनीहरू निर्वाचित भएको पद स्वतः रिक्त भएको निर्णय गरेको हो ।
मंगलबार आयोगले एक सूचना प्रकाशित गरि जुम्ला, नवलपरासी र रुपन्देहीका तीन फरक–फरक तहका जनप्रतिनिधिहरूको पद रिक्त भएको जानकारी गराएको छ ।
पद रिक्त हुनेहरूमा जुम्लाको गुठीचौर गाउँपालिकाका अध्यक्ष दान बहादुर बुढा, नवलपरासी (बर्दघाट सुस्ता पश्चिम) को पाल्हीनन्दन गाउँपालिकाकी उपाध्यक्ष फातिमा खातुन अन्सारी र रुपन्देहीको बुटवल उपमहानगरपालिका वडा नं. ३ का वडा अध्यक्ष बिष्णु ढकाल रहेका छन् ।
नेपाली कांग्रेसको केन्द्रीय कार्य सम्पादन समितिले ती जनप्रतिनिधिहरू अन्य दलमा प्रवेश गरेको भनी प्रमाणसहित पद रिक्त गराउन आयोगलाई जानकारी गराएको थियो । राजनीतिक दल सम्बन्धी ऐन, २०७३ को दफा ३२ को उपदफा (१) र राजनीतिक दल सम्बन्धी नियमावली, २०७४ को नियम २२ मा भएको व्यवस्था अनुसार कुनै पनि निर्वाचित प्रतिनिधिले दल त्याग गरेमा उसको पद स्वतः रिक्त हुने कानूनी प्रावधान छ ।
सोही कानूनी व्यवस्था र दलको केन्द्रीय समितिको निर्णयका आधारमा निर्वाचन आयोगको असार ८ गतेको बैठकले निजहरूका पदहरू रिक्त भएको निर्णय गरेको हो । आयोगले राजनीतिक दल सम्बन्धी नियमावली,२०७४ को नियम २२ को उपनियम (२) बमोजिम यो सूचना सर्वसाधारण र सम्बन्धित सबैको जानकारीका लागि प्रकाशन गरिएको मंगलबार जनाएको छ ।
यसैबीच फातुमासहित नवलपरासीबाट ४३ जना नेता तथा कार्यकर्तालाई कारबाहीका लागि केन्द्रमा सिफारिस गरिएको नेपाली कांग्रेस नवलपरासीले जनाएको छ । जसमा ६ जना निर्वाचित जनप्रतिनिधिहरु रहेका छन् ।
कारबाहीका लागि सिफारिस गरिएका अन्य जनप्रतिनिधिमा लुम्बिनी प्रदेशका वन तथा वातावरण मन्त्री देवकरण कलवार, सुस्ता गाउँपालिकाकी उपाध्यक्ष गीता चौधरी, बर्दघाट नगरपालिका–१० का वडाध्यक्ष राजु मिश्र, वडा नम्बर ९ का वडा सदस्य बालिन्द्र विक्रम शाही र सुनवल नगरपालिका–२ का वडा सदस्य विकास क्षेत्री रहेका छन् । कारबाहीका लागि सिफारिस भएका उनीहरुले खुलेर रास्वपाका उम्मेदवारलाई भोट मागेको बताइएको छ ।
