बुटवल,३ बैशाख ।
यातायात मजदुर तथा व्यवसायी भलाइ कोषकाे ५२औँ स्थापना दिवस तथा ४८औँ वार्षिक साधारणसभा बिहीबार बुटवलमा सम्पन्न भएको छ ।
साधारणसभाको उद्घाटन गर्दै कोषका पूर्वअध्यक्ष कुमार थापाले पछिल्लो समय सवारी साधनको संख्यामा भएको तीव्र वृद्धिसँगै सडक दुर्घटना एक गम्भीर राष्ट्रिय चुनौतीका रूपमा देखा परेको बताए । देशभर सवारी साधनको संख्या ८० लाख नाघिसकेको तथ्यांक प्रस्तुत गर्दै उनले सडकमा सवारीको चाप उल्लेख्य रूपमा बढेको उल्लेख गरे ।
विशेषगरी दुई पाङ्ग्रे सवारी साधनको अत्यधिक वृद्धि नै दुर्घटना बढ्नुको प्रमुख कारण रहेको र करिब ८० प्रतिशत दुर्घटनामा मोटरसाइकल संलग्न रहेको सरकारी तथ्यांकले देखाएको उनले बताए । यस समस्याको दीर्घकालीन समाधानका लागि सरकारले एक शक्तिशाली आयोग वा बोर्ड गठन गरेर काम गर्नुपर्ने उनको भनाइ छ ।
संस्थाका अध्यक्ष दिनेश फुल्लेलले मजदुर र व्यवसायीको हकहितमा कोषले पु¥याएको योगदानका बारेमा प्रकाश पारे । हाल देशभर २९ वटा शाखा र ६८ जना कर्मचारीमार्फत सेवा प्रवाह गरिरहेको जानकारी दिँदै उनले आर्थिक वर्ष २०८२/८३ मा मात्रै एक हजार १३५ वटा सवारी दुर्घटनामा आर्थिक, नैतिक र भौतिक सहयोग गरिएको बताए ।
उनले यसै वर्षदेखि साविक लुम्बिनी अञ्चलका ६ जिल्लाहरू कपिलवस्तु, नवलपरासी, रुपन्देही, गुल्मी, पाल्पा र अर्घाखाँचीमा प्रथम पक्ष (ओडी) सवारी साधनमा शतप्रतिशत लगानी गर्ने कार्यको सुरुवात गरिएको जानकारी दिए । हाल दुर्घटनापश्चात् घाइतेको उपचारका लागि ३ लाख र मृत्यु भएमा क्षतिपूर्तिबापत बिमाबाट ५ लाख पाप्त हुने बताउँदै अध्यक्ष फुल्लेलले यो रकमलाई समयसापेक्ष बनाउनुपर्नेमा जोड दिए ।
त्यस्तै, पश्चिम नेपाल बस व्यवसायी प्रालिका अध्यक्ष दधिराम खरेलले पेट्रोलियम पदार्थको मूल्यवृद्धिका कारण यातायात क्षेत्र संकटमा परेको र विद्युतीय गाडीको बढ्दो प्रयोगसँगै मर्मत खर्च र पार्टपुर्जामा हुने भन्सार शुल्क लगायतका विषयमा सरकार गम्भीर हुनुपर्ने बताए । कार्यक्रममा पूर्वअध्यक्ष चीनबहादुर गुरुङलगायत विभिन्न उद्योग वाणिज्य संघ र व्यावसायिक संस्थाका प्रतिनिधिहरूले सडक सुरक्षाका लागि साझा एजेन्डा बनाएर अघि बढ्नुपर्ने बताए ।
कार्यक्रममा रुपन्देही उद्योग संघका अध्यक्ष कृष्ण पराजुली, रुपन्देही ब्यापार संघका अध्यक्ष प्रकाश ढकाल, बुटवल उद्योग वाणिज्य संघका महासचिव मुक्ति अधिकारी, ट्रक व्यवसायी रुमाखर गौतम, पत्रकार दिनेश पाण्डे, कोषका पूर्व सहसचिव काजिमान श्रेष्ठ लगायतले बोल्दै सडक दुर्घटना न्युनीकरणका लागि संस्थागत रुपमा तालिम र अभिमुखिकरणसँगै साझा एजेन्डा बनाएर अघि बढ्नुपर्नेमा जोड दिए ।
साे अवसरमा संस्थाले दुर्घटनामा ज्यान गुमाएका चालक खेमबहादुर सारुको परिवारलाई ५० हजार रुपैयाँ आर्थिक सहयोग प्रदान गरेको छ । साथै, संस्थामा २५ वर्षभन्दा लामो समय सेवा गर्ने कर्मचारीहरू सरस्वती ढकाल अर्याल र निर्मल शर्मा पाण्डेलाई पनि विशेष सम्मान गरिएको काेषका काेषाध्यक्ष प्रकाश कुमार नेपालले जानकारी दिए ।
स्थापना दिवसको अवसरमा आयोजित रक्तदानमा भलाई कोषका ८२ जनाद्वारा रक्तदान
स्थापना दिवस तथा साधारणसभाकाे अवसरमा बिहीबार काेषको कार्यालय परिसरमा आयोजित रक्तदान कार्यक्रममा ८२ जनाले रक्तदान गरेको अध्यक्ष दिनेश फुल्लेलले जानकारी दिए ।
नेपाल रेडक्रस सोसाइटीको प्राविधिक सहयोगमा भएको कार्यक्रममा कोषका पदाधिकारी, सदस्य, कर्मचारी, मजदूर तथा व्यवसायीले रक्तदान गरेका थिए । कोषले स्थापना दिवसका अवसरमा विगतका वर्षहरुदेखि नै रक्तदान कार्यक्रमलाई निरन्तरता दिंदै आएको छ ।
बिरामीहरुलाई रगतको अभाव झेल्नु नपरोस् भन्ने उद्देश्यले रक्तदान कार्यक्रमको आयोजना गरिएको कोषका महासचिव योग गुरुङले जानकारी दिए । त्यस अवसरमा कोषले निःशुल्क स्वास्थ्य शिविरको समेत आयोजना गरेको थियो ।
