गुल्मी,१५ माघ ।
गुल्मीकाे इस्मामा आफ्नै बाबुद्वारा तीन महिने शिशुको हत्या भएको छ । हत्या गर्नेमा गुल्मीको इस्मा गाउँपालिका-३ छल्दीटारमा ४६ वर्षीय सन्तबहादुर कुमाल रहेका छन् । उनले आफ्नै तीन महिने शिशु सुवास कुमाललाई भुइँमा पछारेर हत्या गरेको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुले जानकारी दिए ।
उनका अनुसार मापसे गरेर बुबाले आफ्नै तीन महिनाको शिशु छोरा सुवास कुमालकाे बिहान साढे ९ बजे आसपासमा हत्या गरेको खुलेको छ । घटनासम्बन्धी जेठी छोरी सरिता कुमाले प्रहरी चौकी हस्तीचौरमा जानकारी गराएकी थिइन् ।
घटनास्थलमा प्रहरी सहायक निरीक्षक विनय कुमार श्रीवास्तवको कमान्डमा दुई जना र जिल्ला प्रहरी कार्यालयबाट प्रहरी निरीक्षक पर्वतकुमार केसीको नेतृत्वमा पाँच जनाको टाेली खटिएको जिल्ला प्रहरी कार्यालय गुल्मीले जनाएको छ । छाेरा सुवासकाे हत्या गरेको बुबा सन्तबहादुरले स्वीकार गरेका छन् । यससम्बन्धी कारण भने खुलिसकेको छैन ।
घटनाबारे थप अनुसन्धान भइरहेको प्रहरीले जनाएको छ । श्रीमान् र श्रीमती विवादमा मादक पदार्थ सेवन गरेका उनलेे शिशुको हत्या गरेको प्रारम्भिक अनुसन्धानबाट खुलेको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक सारुले बताए ।
