बुटवल,१८ मंसिर ।
स्थानीयकाे बिराेधका बाबजुद लुम्बिनी विकास कोषका सदस्य सचिव दीपक श्रेष्ठले पदभार ग्रहण गरेका छन् ।
तत्कालीन मुख्य सचिव एकनारायण अर्यालले मन्त्रिपरिषद्काे निर्णय प्रमाणीकरण नगरेपछि ढिलो नियुक्ति पाएका लुम्बिनी विकास कोष सदस्य सचिव इन्जिनियर दीपक श्रेष्ठले बुधबार पदभार ग्रहण गरेका हुन् ।
श्रेष्ठले लुम्बिनी विकास कोषको केन्द्रीय कार्यालयमा हाजिरी गरेर पदभार ग्रहण गरेका हुन् । तत्कालीन मुख्य सचिव अर्यालले निर्णय प्रमाणीकरण नगरेपछि कानुनी मान्यता नपाउँदा फेरि मंसिर १५ गते बसेको मन्त्रिपरिषद् बैठकले श्रेष्ठलाई मनोनीत गर्ने निर्णय गरेपछि बुधबार पदभार ग्रहण गरेका हुन् ।
गत मंसिर ४ गतेकै क्याबिनेट बैठकले उनलाई सदस्य सचिव पदमा नियुक्त गरेको थियो । उनले राजीनामा दिएर कोष सदस्य सचिव बनेका हुन् । पदभार ग्रहण गर्दै उनलेे लुम्बिनीलाई उत्कृष्ट आध्यात्मिक पर्यटकीय गन्तव्य स्थल बनाउन योजनावद्व रूपमा काम गर्ने प्रतिवद्वता ब्यक्त गरेका छन् ।
लामो समयदेखि अधुरो रहेको लुम्बिनी विकास गुरुयोजना पूरा गर्ने तर्फ ध्यान केन्द्रित गर्ने भन्दै उनलेे ‘स्थानीयको भावना र चाहनालाई प्राथमिकता दिने बताएका छन् ।
लुम्बिनीका केही स्थानीय बासिन्दाले भने लुम्बिनी विकास काेषकाे पदाधिकारी स्थानीय र बिषय विज्ञ हुनुपर्ने माग गर्दै सदस्य सचिव नियुक्तिको बिराेध गर्दै आएका थिए ।
