काठमाडौँ,१९ भदौ ।
विधायन ब्यवस्थापन सम्बन्धमा व्यवस्था गर्न बनेको विधेयक संसदीय समितिबाट पारित भएको छ । बुधबार सिंहदरबारमा बसेको संघीय संसद् प्रतिनिधि सभा अन्तर्गतको कानुन, न्याय तथा मानव अधिकार समितिको बैठकले सो विधेयक संशोधनसहित पारित गरेको हो ।
विधेयक सम्बन्धी मस्यौदालाई आवश्यक संशोधनसहित पारित गरिएको समितिकी सभापति विमला सुवेदीले जानकारी दिइन् । साथै समितिकाे प्रतिवेदन सहितको सो विधेयक प्रतिनिधि सभाको आगामी बैठकमा पेस गर्न सभामुख देवराज घिमिरेलाई अनुरोध गर्ने निर्णय पनि समितिले गरेको छ ।
समितिकी सभापति सुवेदीले भनिन्,‘समितिको आजको बैठकमा पेस भएको विधायन सम्बन्धमा व्यवस्था गर्न बनेको विधेयक सम्बन्धी समितिको प्रतिवेदनको मस्यौदालाई आवश्यक संशोधनसहित पारित भएको घोषणा गर्दछु ।’
बैठकमा समितिका सदस्यहरूले सरकारले दिएको कार्यतालिका अनुसार कानुन निर्माण कार्यलाई बाध्यकारी बनाउनुपर्नेमा जोड दिएका थिए ।
प्रमुख प्रतिपक्ष दल नेकपा (माओवादी केन्द्र)का सांसद पूर्णबहादुर घर्तीले सरकारले तय गरेका कार्यक्रमलाई कार्यान्वयन गर्न पनि सरकारले समयमै कानुन निर्माणको काम सम्पन्न गर्नुपर्ने भएकाले ती विषयलाई पनि कानुनमा समेटेर अघि बढ्न आवश्यक रहेको बताए ।
राष्ट्रिय स्वतन्त्र पार्टी (रास्वपा)की सांसद सोविता गौतमले तत्काल कुनै विधेयक तर्जुमा गर्नुपरे बाधा नआउने गरी कानुनी व्यवस्था गर्नुपर्नेमा जाेड दिइन् । उनले सरकारले ल्याएको कानुन निर्माण सम्बन्धी कार्यतालिका तलमाथि गर्न नहुने पनि बताइन् ।
बैठकमा कानुन निर्माण प्रक्रियालाई थप पारदर्शी र गुणस्तरीय बनाउन पनि सांसदहरूले सरकारको ध्यानाकर्षण गराएका थिए ।
