अंकारा,१ भदौ ।
टर्कीको संसदमा सांसदहरूबिच कुटाकुट भएको छ ।
जेलमा रहेका विपक्षी नेता कैन अतालेको अवस्थाबारे छलफलका क्रममा टर्कीको संसदमा सांसदहरूबिच झडप भएको हो । यो घटनाको भिडियो सामाजिक सञ्जालमा भाइरल भइरहेको छ ।
भिडियो फुटेजमा वामपन्थी टर्किस वर्कर्स पार्टी (टिआईपी) का सांसद अहमेत सिकले मञ्चमा भाषण दिइरहेको बेला राष्ट्रपति रेसेप तैयप एर्दोगानको सत्तारूढ एके पार्टीका सांसद अल्पे ओजालान उनीसामु आएर थप्पड हान्ने प्रयास गरेको देख्न सकिन्छ ।
यसपछि अहमद सिक भुइँमा लड्छन् । यो घटनापछि झडपको स्थिति बनेको थियो । अधिकारीहरूले झगडापछि भुइँबाट रगत सफा गरिरहेको पनि देखियो ।
वकिल र मानव अधिकार कार्यकर्ता कैन अतालेले यस वर्षको सुरुमा आफ्नो संसदीय सीट गुमाएका थिए । उनलाई २०२२ मा १८ वर्षको जेल सजाय सुनाइएको थियो । त्यसपछि उनले जेलबाटै चुनाव लडेका थिए ।
यो निर्णय एक विवादास्पद मुद्दा पछि आएको थियो जसमा पुरस्कार विजेता परोपकारी उस्मान कावलालाई पनि आजीवन कारावासको सजाय सुनाइएको थियो ।
