काठमाडौँ,२० साउन ।
नेपाल विद्युत् प्राधिकरणको सञ्चालक समितिका दुई जना सदस्य पदमुक्त भएका छन् । पदमुक्त हुनेमा बोर्ड सदस्यद्वयमा भक्तबहादुर पुन र कपिल आचार्य रहेका छन् ।
उद्योगी व्यवसायीहरुले डेडिकेटेड र ट्रङ्क लाइनको बक्यौता तिर्नुपर्ने अडान राख्दै आएका आचार्य र पुनलाई ऊर्जा जलस्रोत तथा सिँचाइ मन्त्रालयले बोर्ड सदस्यबाट हटाएको हो । आफूहरूलाई इमेलमार्फत हटाएको पत्र आएको आचार्यले बताए ।
डेडिकेटेड र ट्रङ्क लाइनको विद्युत् सुविधा प्रयोग गरेर बक्यौता नतिर्ने उद्योगको लाइन काटिएको र ती उद्योगीले बक्यौता नतिरेसम्म लाइन जोड्न नहुने अडान लिएका उनीहरूलाई साउन १५ मा लिखित स्पष्टीकरण सोधिएको थियो । साउन १८ मा उनीहरूले स्पष्टीकरण बुझाएका थिए ।
सोही दिन उनीहरूलाई सञ्चालक समिति सदस्यबाट हटाउने निर्णय भएको हो । स्पष्टीकरण सन्तोषजनक नदेखिएको भन्दै मन्त्री दीपक खड्काले उनीहरूलाई हटाउने निर्णय गरेको मन्त्रालयले जनाएको छ ।
आचार्यले सरकारले आफूहरूलाई चार वर्षको नियुक्ति दिएको र राज्यको पक्षमा उभिँदा राज्यले नै अनावश्यक आरोप लगाएर हटाएपछि आफूहरू न्यायका लागि अदालत जाने बताए । ‘चार वर्षका लागि नियुक्ति दिइएको हो । तीन वर्ष भएको छ । यो बेला हामीले राज्यको पक्षमा बोल्दा हटाउने काम भयो’, आचार्यले भने, ‘अब न्यायको ढोका ढकढक्याउन बाध्य भएका छौँ ।’
भर्खर पत्र प्राप्त भएको भन्दै उनलेे कानुनी परामर्शपछि अदालत जाने बताए ।






