फाइल तस्बिर
काठमाण्डौ,२९ जेठ ।
पूर्वबाट मनसुन भित्रिए पनि देशका मध्य र पश्चिम क्षेत्रमा तापक्रम उच्च नै रहेको मौसम पूर्वानुमान महाशाखाले जनाएको छ ।
आज पनि तराई क्षेत्रका केही ठाउँमा तापक्रम ४० देखि ४४ डिग्री सेल्सियससम्म रहन सक्ने महाशाखाको अनुमान छ ।
नेपालमा मनसुन भित्रिएपनि पश्चिम तराईमा तापक्रम अझै एक/दुई दिनसम्म तापक्रम उच्च नै रहने मौसमविद्ले बताएका छन् ।
महाशाखाका अनुसार आज लुम्बिनी, कर्णाली र सुदूरपश्चिम प्रदेशका थोरै ठाउँमा हावाहुरीको पनि सम्भावना छ ।
पूर्वबाट भित्रिएको मनसुन विस्तारै पश्चिमतर्फ लाग्नेछ । अबको चार/पाँच दिनमा मनसुन पश्चिम सर्ने महाशाखाले जनाएको छ ।
नेपालमा मनसुन भित्रिएसँगै पूर्वी क्षेत्रमा भने त्यसको प्रभाव देखिन थालेको छ । मौसम पूर्वानुमान महाशाखाकाअनुसार आज पूर्वको कोशी प्रदेशसहित बाग्मती र गण्डकी प्रदेशको पहाडी क्षेत्रका एक–दुई ठाउँमा हल्कादेखि मध्यम वर्षाको सम्भावना छ ।
कोशी प्रदेशमा मनसुनको प्रभावले केही ठाउँमा पानी परिरहेको महाशाखाका मौसमविद् गोबिन्द झाले जानकारी दिए ।
