बुटवल,३० चैत ।
बुटवलमा सम्पन्न शहिद प्रचण्ड थैव स्मृति दोस्रो सौभाग्य गोल्डकप फुटबल प्रतियोगिता २०८२ को उपाधि देवदह एफसीले चुमेको छ ।
सोमबार सम्पन्न फाईनलमा कपिलबस्तु–११ लाई ३–१ गोल अन्तरले पराजित गर्दै देवदहले उपाधि चुमेको हो । उपाधिसंगै देवदह नगद ५ लाख ५ हजार, कप, मेडल, प्रमाणपत्रबाट पुरस्कृत भयो ।
उपविजेता कपिलवस्तु भने नगद २ लाख ५१ हजारसहित ट्रफी, मेडलमा चित्त बुझायो । फाईनल खेलमा देवदहका आशिष जिसी म्यान अफ दि म्याचबाट पुरस्कृत भए ।
सिद्धेश्वर खेलमैदानमा भएको खेलमा देवदहको जितमा सुरज चौधरी नायक रहे । उनले विजयी दुई गोल गरे । उनि प्रतियोगितामा सर्वोत्कृष्ट खेलाडी घोषित हुदै नगद २५ हजार रुपैया, कपबाट पुरस्कृत भए । देवदहका आशिष जिसीले थप एक गोल गरे । कपिलवस्तुका श्याम बियादीले सान्त्वना गोल गरे ।
प्रतियोगितामा कपिलबस्तुका गणेश पुलामी मगर बेष्ट मिडफिल्डर, देवदहका बिशाल केसी बेष्ट किपर, उत्कृष्ट डिफेन्डर एनिसेट एडिया, देवदहका सुरज चौधरी हाईस्कोर, देवदह ब्याईजका बिजय गुरुङ वेष्ट कोच बन्दै नगद ११ हजार, कपबाट पुरस्कृत भए ।
विजेता, उपविजेता तथा उत्कृष्ट खेलाडीहरुलाई एक कार्यक्रमका बिच बुटवल उपमहानगरपालिकाका नगरप्रमुख खेलराज पाण्डेय,नगर खेलकुद विकास समिति बुटवलका संयोजक बोनिन पिया, क्लबका अध्यक्ष सुजु मल्ल, सचिव प्रकाश क्षेत्रीलगायतले पुरस्कार वितरण गरे ।
