काठमाडौँ,६ वैशाख ।
काठमाण्डौमा जारी वीर गणेशमान सिंह टी-२० राष्ट्रिय क्रिकेट च्याम्पियनशिपमा लुम्बिनी प्रदेशले कर्णालीमाथि सहज जित निकालेको छ ।
कर्णाली प्रदेशलाई हराउँदै लुम्बिनीले प्रतियोगितामा दोस्रो खेल जितेको छ । मूलपानी क्रिकेट मैदानमा आज भएको खेलमा लुम्बिनीले कर्णाली प्रदेशलाई ७ विकेटले पराजित गरेको हो ।
जितसँगै लुम्बिनीले ३ खेलबाट ४ अङ्क जोडेको छ। यसअघि गण्डकी प्रदेशलाई ७ विकेटले पराजित गरेको लुम्बिनी मधेशसँग २७ रनले पराजित भएको थियो।
कर्णालीले प्रस्तुत गरेको ८२ रनको सामान्य लक्ष्य लुम्बिनीले १२ ओभर २ बलमा ३ विकेट गुमाउँदै पूरा गर्यो ।
लुम्बिनीका लागि कप्तान देव खेनालले २९ बलमा ७ चौका र १ छक्काको मद्दतले अविजित ५१ रन बनाए। यसैगरी मृणाल गुरुङले १३ रन जोड्दा विराट भण्डारीले अविजित १० रन बनाए ।
कर्णालीका लागि कप्तान दिवान पुनले २ विकेट लिए ।
त्यसअघि टस जितेर पहिला ब्याटिङ रोजेको कर्णालीले १६ दशमलव ४ ओभरमा सबै विकेट गुमाउँदै ८१ रनको बनाएको थियो ।
उसका लागि अर्जुन घर्तीले सर्वाधिक २८ रनको योगदान दिए भने दिवान पुनले १२ तथा दीपेन्द्र रावलले ११ रन बनाए ।
कर्णालीलाई सस्तैमा समेट्ने क्रममा लुम्बिनीका देव खनाल‚ अविशेक गौतम र वीर मगरले २/२ विकेट लिए भने निर्मल गुरुङ, कृष्ण कार्की र नर सार्कीले १/१ विकेट लिए ।
