काठमाडौं,१४ कार्तिक ।
खेलकुद क्षेत्रमा पछिल्लो समय उदयीमान खेलाडीका रुपमा आफूलाई स्थापित गरेका कुस्ती खेलाडी संगीता धामी आसन्न मंसिर ४ गते हुने निर्वाचन सुरक्षामा खटिन म्यादी प्रहरीमा भर्ना भएकी छन् ।

पारिवारिक आर्थिक अवस्था नाजुक हुँदा आफू म्यादी प्रहरीमा भर्ना भएको धामीको भनाइ छ ।
पोखरामा नवौँ राष्ट्रिय खेलकुद प्रतियोगितामा पनि उनले स्वर्णपदक जितेकी थिइन् । त्यस्तै देशमै भएको १३औँ दक्षिण एशियाली खेलुकद प्रतियोगिता (साग)मा उनले पहिलो पटक कुस्तीबाट स्वर्ण जितेकी थिइन् ।

‘हामीले खेलकुदका माध्यमबाट देश चिनाएर आफ्नो कर्तव्य पूरा ग¥यौँ’, हाल जिल्ला प्रहरी कार्यालय कञ्चनपुरमा म्यादी प्रहरीमा कार्यरत धामीले भनिन्, ‘तर इतिहास रच्ने खेलाडीको राज्यले रोजगारीको ग्यारेन्टी नगर्दा खेलाडी हुँ भन्न पनि गाह्रो मान्नुपर्ने अवस्था आयो ।’

दार्चुलाको शैल्यशिखर नगरपालिका स्थायी घर भएकी धामी कञ्चनपुरको भीमदत्त नगरपालिका–३ तिलकपुर ठूलोबुवाको घरमा बस्दै आएकी छन् ।

बाल्यावस्थामै बुवा अर्कै श्रीमती लिएर घरबाट निस्केपछि आमा धनादेवीको सहारामा यहाँसम्म आइपुगेकी धामीको अझै पारिवारिक अवस्था दयनीय छ ।

‘आमाले भैँसीपालन गरेर दूध बेचेर हामीलाई यहाँसम्म पु¥याउनुभयो’, उनले भनिन्, ‘अहिले कहिलेकाहीँ म पनि दूध बेच्न महेन्द्रनगर बजार आउँछु ।’

धामी म्यादी प्रहरीमा भर्नासँगै यहीबीचमा नवौँमा स्वर्ण जितेर फर्किएका हुन् । सागमा स्वर्ण जित्दा सरकार र विभिन्न नगरपालिकाबाट पाएको रकमले घर खर्च चलेको उनको भनाइ छ ।

‘सानैमा बुवाले आमालाई छाडेर जाँदा उहाँले लगाउने खाने रहर अधुरै रह्यो’, धामीले भने, ‘म्यादी प्रहरीबाट आएको रकमले आमालाई थोरै भएपनि सुन किनेर रहर पूरा गर्ने योजना छ ।’

संगीताका बहिनी रीता प्रवीणता प्रमाणपत्र तह र संगीता स्नातक तहमा अध्ययनरत छिन् । ‘दुवैको खर्च पनि मेरै खेलकुदबाट आएको रकमले चलेको थियो’ उनले भनिन्, ‘अहिले स्वर्ण जितेर आउँदा रातो टीकासम्म लगाएर हौसला दिनुभएन ।’

खेलकुद र पढाइलाई निरन्तरता दिएकी संगीताले नेपाली सेना र प्रहरीमा जागिर खाने धोको पूरा नहुनेमा चिन्ता रहेको दुखेसो पोखिन् ।

‘अन्तर्राष्ट्रियस्तरमा मुलुकलाई पदक दिलाउँदा कतै जागिर पाइन्छ कि भन्ने आशा थियो’, उनले भनिन्, ‘अहिले पनि यति ठूलो खेलाडी म्यादीमा हुँदा समाजले कतै कुरा काट्छन कि भनेर चिन्ता हुन्छ ।’

खेलाडी भएर मुलुकको इज्जत बढाउने स्तरका प्रतिभावान खेलाडीलाई राज्यले रोजगारीका विषयमा सोच्नुपर्ने उनको भनाइ छ । ‘पदक दिलाउने खेलाडीलाई पालिकास्तरसम्म भएपनि जागिरको व्यवस्था गर्नुपर्छ’, उनले भनिन्, ‘शरीरमा ताकत हुँदा खेलेपनि पछि गएर जिविका चलाउन बाहिरिनुपर्ने बाध्यता भयो ।’

उनले अन्य मुलुकमा अन्तर्राष्ट्रियस्तरमा पदक ल्याउने खेलाडीलाई सम्मान र रोजगारीको कुनै कमी नहुने गरेको बताइन् ।

उनले भने, ‘अहिले म्यादीमा भर्ना भएर राज्यले गरिरहेको चुनावमा सुरक्षा प्रदान गर्ने जिम्मेवारी पाउँदा हर्षित नै छु’, ‘स्थायी रोजगारी पाउने आशैआशमा निराशा छाएको छ ।’

संगीतासँगै कुस्तीकी नवौँ राष्ट्रिय प्रतियोगितामा अर्की स्वर्णपदक विजेता खेलाडी हेमा भट्टलगायत पाँच–६ जना राष्ट्रिय खेलाडी अहिले कञ्चनपुरमा म्यादीमा भर्ना भएका छन् ।

कञ्चनपुरका कुस्ती प्रशिक्षक राजेन्द्र चन्दले खेलाडीलाई राज्यले सुविधा दिने विषयमा सोच्नुपर्ने बेला आएको बताए ।

‘सागको स्वर्ण जित्ने चेलीले आज जागरिका लागि भौतारिनुपर्ने बाध्यता आउनु राम्रो कुरो होइन’, उनले भने, ‘अब पालिकामा पदक विजेता खेलाडीलाई रोजगारीको व्यवस्थाका लागि गुहार माग्छौँ ।’

उनले खेलाडी भएर बाँच्न गाह्रो रहेको बताए । नवौँ राष्ट्रिय खेलकुदमा सुदूरपश्चिमले १० स्वर्ण जित्दा कुस्तीमा मात्रै कञ्चनपुरका पाँच महिला खेलाडीले स्वर्ण दिलाएका थिए ।