काठमाडौं,२२ असोज ।
साझा पार्टीले केन्द्रीय समितिलाई पुनर्गठन गरी ६५ सदस्यीय बनाएको छ । सात प्रदेश तथा साझा युवा संगठनबाट ३७ जना थपेर ६५ सदस्यीय केन्द्रीय समिति बनाइएको संयोजक रवीन्द्र मिश्रले जानकारी दिए ।

गत फागुनमा लुम्बिनीमा सम्पन्न साझा पार्टीको राष्ट्रिय भेलाले केन्द्रीय समिति पुनर्गठन गर्ने निर्णय गरेको थियो । पुनर्गठनसँगै साझा पार्टी आफ्ना राजनीतिक मुद्दा र विचार बोकेर देशभरि नै विश्वासिलो विकल्पका रूपमा जनता माझ जाने उनले बताए ।

थपिएका ३७ जना सदस्यमा १० जना महिला रहेका छन् । समय दिएर अग्रपंक्तिको राजनीतिक नेतृत्व लिन चाहने महिला, विभिन्न समावेशी समूहका सदस्यको अझै पनि पार्टीले अभाव महसुस गरेको संयोजक मिश्रले विज्ञप्तिमार्फत जानकारी दिएका छन् ।

साझा पार्टी महिला तथा समावेशी नेतृत्वलाई व्यापकरूपमा प्रवर्द्धन गर्न चाहन्छ भन्दै विज्ञप्तिमा महिला लगायत सबै समावेशी समूहका सदस्यलाई वैकल्पिक र सुसंस्कृत राजनीतिको अभियानमा संलग्न हुन आह्वान समेत गरिएको छ ।

देशमा परिणाममुखी लोकतन्त्र, सुशासन, विकास र संवृद्धि सुनिश्चित गर्ने हो भने अब फरक धारबाट अगाडि बढेका पछिल्ला राजनीतिक प्रयत्नहरुलाई एकिकृत गर्नुपर्छ भन्ने पार्टीको ठहर रहेको जनाउदै विज्ञप्तिमा नयाँ र वैकल्पिक राजनीतिक शक्तिहरुको एकता आजको आवश्यकता भएकोमा जोड दिइएको छ ।

विज्ञप्तिमा भनिएको छ–‘राजनीतिलाई नयाँ दिशा दिने समय घर्किँदै गइरहेको छ । अब ढिलो गर्नु हुदैन र राजनीतिक विकल्प निर्माण गर्न सम्पूर्ण प्रयत्नहरू एकीकृत गर्नुपर्छ भन्ने हाम्रो विश्वास हो । त्यसका लागि देश–विदेशमा रहेका विभिन्न अभियान तथा नागरिक समूहहरू, पुराना दलका इमानदार, कर्मठ र देशभक्त नेता, सदस्य तथा शुभेच्छुकहरू सबैलाई एक जुट हुन हामी हार्दिक आह्वान गर्दछौँ ।’

पुनर्गठीत पार्टीको केन्द्रीय समितिमा थपिएकाहरुमा महेन्द्र थापा, अमलेश कर्ण, धनपति महतो, सुमनकुमार मिश्रा, दिव्येश गिरी, मुरली मनोहर मिश्र, अनुपा श्रेष्ठ, पुष्पा सापकोटा, सुरज प्रधान, प्रदीप थापा, भुपेन्द्र बस्नेत, अमृत पुडासैनी रहेका छन् ।

त्यस्तै दीपक पौडेल, हरिप्रसाद गौतम, अर्जुनप्रसाद खनाल, नवराज थापा, हरिकृष्ण अधिकारी, इन्दिरा वाग्ले शर्मा, मधुसुदन केसी, केशवबहादुर मल्ल, सुशीलराज देवकोटा, घनश्याम विश्वकर्मा, पवन मल्ल, संगीता श्रेष्ठ पनि साझा पार्टीको केन्द्रीय समितिमा थपिएका छन् ।

केन्द्रीय समितिमा थपिने अरु सदस्यमा लक्ष्मी शाही, दुज्जी चौधरी, घनबहादुर शाह, सरोज गौतम, प्रकाश आचार्य, पवित्र थापा, सस्मित पोखरेल, संजय बराल, आशिष रेग्मी, दीपक उप्रेती, विणा शाह, शारदा रिजाल र लक्ष्मी घिमिरे रहेका छन् ।