घटनाको छानबिन गरि तत्काल उनको अवस्था सार्वजनिक गर्न माग

बुटवल, १९ साउन ।
लुम्बिनी प्रदेश सभा सदस्य विमला खत्री वलीलाई मुख्यमन्त्री शंकर पोखरेलको सरकारी निवासमा ‘बन्धक’ बनाइएकाे माओवादी केन्द्रले आरोप लगाएको छ ।
उनलाई मुख्यमन्त्री निवासै बन्धक बनाई जबरजस्ती एमालेमै रहेको भन्ने विज्ञप्ति निकालिएको माओवादी केन्द्रकाे आरोप छ ।

माओवादी केन्द्रले घटनाको बारेमा गृह मन्त्रालयमार्फत उच्चस्तरीय छानबिन गर्न र विमलाको स्थिति सार्वजनिक गर्नुका साथै उनको जीवन रक्षा गर्न सरकारसँग माग गरेको छ ।

पूर्वमन्त्री एवम् लुम्बिनी प्रदेश सभाका माओवादी केन्द्रका प्रदेश सभा सदस्य सुदर्शन बरालले सत्ताको चरम दुरुपयोग गरी विमलालाई मुख्यमन्त्री पोखरलेको निवासमा ‘बन्धक’ बनाई खाली कागजमा हस्ताक्षर गराई जबरजस्ती विज्ञप्ति निकालेको दाबी गरे ।

विमलालाई मुख्यमन्त्री, एमालेका प्रमुख सचेतकलगायतका नेताले करकाप गरेर हस्ताक्षर गर्न लगाई नक्कली विज्ञप्ति बनाइएको दाबी गर्दै उनलेे घटनाको उच्चस्तरीय छानबिन हुनुपर्ने बताए ।

एकजना जनप्रतिनिधिलाई बन्धक बनाएर पार्टी र मिडियासँग सम्पर्कविहीन बनाउनु गम्भीर विषय भएको भन्दै यस सम्बन्धमा उच्चस्तरीय छानबिन हुनुपर्ने बरालको माग छ ।

विमलाले एमाले रोजेको कुरा माओवादी केन्द्रलाई विश्वास नभएको उनले बताए । यदि साँचीकै एमाले रोजेको हो भने यसअघि जस्तै पत्रकार सम्मेलन गरेर विमलाले सार्वजनिकरुपमा भन्नसक्नुपर्ने बरालले बताए । ‘जनताले, मिडियाले विमलाजीलाई प्रत्यक्ष देख्न, प्रश्न सोध्न पाउनुपर्‍यो, एमाले रोज्नुको कारण के रहेछ थाहा पाउनुपर्‍यो,’ बरालले भने, ‘बिरामी नै हुनुहुन्छ भने पनि अस्पतालमै भेट्न पाउनुपर्‍यो, बन्द कोठाभित्रबाट निकालेको नक्कली विज्ञप्तिमा विश्वास गर्न सकिंदैन ।’

विमलाले पुष्टि हुने गरी एमाले रोजेको हो भने पार्टीले विधि प्रकृया पूरा गरेर तत्काल सांसद पदबाट मुक्त गर्ने बरालले स्पष्ट पारे ।
बहुमत गुमाउँदा पनि ‘मुख्यमन्त्री पाेखरेलले वैशाखदेखि जसरी जालझेल र षड्यन्त्र गरेर असंवैधानिक तरिकाले सत्तामा टाँसिरहेको भन्दै बरालले सांसदलाई खरिद गरेर,अपहरण गरेर सत्ता जोगाउने सपना नदेख्न मुख्यमन्त्री पाेखरेललाई चेतावनी दिए ।

तत्कालीन नेकपाबाट विजयी वलीले फागुन २३ को सर्वोच्चको फैसलापछि गत वैशाख १९ गते पत्रकार सम्मेलन गरी माओवादी केन्द्र रोजेको घोषणा गरेकी थिइन् । उनी प्रदेश सभामा विपक्षी बेन्चमै बस्दै आएकी थिइन् ।

प्रदेशमा एमाले नेतृत्वको सरकार अल्पमतमा परेपछि उनी गत शुक्रबारदेखि माओवादी केन्द्रसँग सम्पर्कविहीन भएकी थिइन् ।